म्याग्दीको बेनी–जोमसोम र बागलुङको कालीगण्डकी करिडोर सडकखण्ड पहिरोका कारण अवरुद्ध। यातायात प्रभावित, सडक खोल्ने प्रयास जारी।
२५ साउन ,काठमाण्डौ
निरन्तर वर्षासँगै आएको पहिरोका कारण म्याग्दी र बागलुङका दुई महत्वपूर्ण सडकखण्ड अवरुद्ध भएका छन्।
म्याग्दीको बेनी–जोमसोम सडकखण्ड आज बिहान पहिरोका कारण पूर्ण रूपमा बन्द भएको छ। रघुगङ्गा गाउँपालिकाको बैसरी क्षेत्रमा ढुङ्गा, माटो र लेदो बगेर सडक ढाकिएपछि यातायात आवागमन ठप्प भएको हो। म्याग्दी प्रहरीले जनाएअनुसार, सडक खोल्ने प्रयास भइरहे पनि पहिरोबाट लगातार ढुङ्गा–माटो खसिरहेकोले काममा कठिनाइ भइरहेको छ।
यस्तै, बागलुङमा पनि कालीगण्डकी करिडोर सडकखण्ड अवरुद्ध भएको छ। बागलुङ नगरपालिका–४ कालाखोला क्षेत्रमा गएराति आएको पहिरोले सडक ढाकिदिँदा यातायात प्रभावित भएको जिल्ला प्रहरी कार्यालय बागलुङले जनाएको छ। प्रहरी निरीक्षक सुनिल शर्मा सिलवालका अनुसार, ठूलो मात्रामा ढुङ्गा र माटो सडकमा थुप्रिएका कारण अहिले पनि सफाइ कार्य जारी छ।
स्थानीय प्रशासन र प्रहरीको संयुक्त टोलीले दुवै सडक सुचारु गर्न निरन्तर प्रयास गरिरहेको भए पनि मौसम र पहिरोको जोखिमका कारण काममा ढिलाइ भइरहेको बताइएको छ।
