२०८२ माघ २४
पाल्पाको राजनीतिक आकाशमा ठाकुर गैरे एउटा यस्तो नाम हो, जसले “सदनमा तर्क र सडकमा गर्जन” दुवै दिन सक्छ। नेकपा एमालेका केन्दिय सदस्य गैरे यतिबेला पाल्पा क्षेत्र नं. २ को चुनावी रापमा छन्। माघको चिसो मौसममा श्रीनगरदेखि बल्ढेङगढीसम्मको घरदैलोमा उनले पाएको जनसमर्थनले एउटा कुरा प्रष्ट पारेको छ— पाल्पाली मतदाता यसपटक ‘परीक्षित र सुरक्षित’ नेतृत्वको पक्षमा छन्।
गैरेले यसपटकको निर्वाचनमा आफ्नो मुख्य एजेन्डा ‘पूर्वाधार र पर्यटन’ लाई बनाएका छन्। चुनावी सभाहरूमा उनले बारम्बार भन्दै आएका छन्: “पाल्पाको दुःख मानिने सिद्धबाबाको सुरुङमार्गलाई समयमै सम्पन्न गराउनु र मदन भण्डारी राजमार्गलाई पाल्पाको समृद्धिको मेरुदण्ड बनाउनु मेरो पहिलो सङ्कल्प हो। ३१ महिनाको मेरो कार्यकालमा यी योजनाहरूलाई गति दिन मैले कुनै कसर बाँकी राखिनँ र अब त्यसलाई निष्कर्षमा पुर्याउनु छ।”उनले पाल्पालाई ‘पर्यटकीय राजधानी’ बनाउने र रानीमहल, तानसेन दरवार तथा भैरवस्थानको विकास गरी स्थानीय रोजगारी सिर्जना गर्ने ठोस खाका अघि सारेका छन्।
गैरेको व्यक्तित्वको सबैभन्दा बलियो पक्ष उनको राष्ट्रवादी छवि हो। अनेरास्ववियुको अध्यक्ष हुँदा कालापानीमा झण्डा गाड्नेदेखि सदनमा राष्ट्रियताका पक्षमा निर्भीक भएर बोल्ने स्वभावले उनलाई पाल्पा बाहिर पनि उत्तिकै लोकप्रिय बनाएको छ। एनसेल कर छली प्रकरणमा उनले संसदमा गरेको गर्जनले उनी “भ्रष्टाचारका कट्टर विरोधी” हुन् भन्ने छाप मतदातामाझ गाढा छ।
विपक्षी दलहरूले गैरेलाई रोक्न विभिन्न मोर्चाबन्दी गरे पनि उनको ‘निष्कलङ्क छवि’ नै विपक्षीका लागि सबैभन्दा ठूलो चुनौती बनेको छ। लामो राजनीतिक जीवनमा कुनै पनि भ्रष्टाचार वा अनियमिततामा नाम नजोडिनुले आम मतदातामा उनीप्रति गहिरो विश्वास छ। तानसेनका एक स्थानीय मतदाता भन्छन्— “अरू नेता चुनाव जित्न पैसा बाँड्छन्, ठाकुर गैरे विचार र विश्वास बाँड्छन्।”
यो निर्वाचनमा गैरेले युवा पुस्तालाई लक्षित गर्दै ‘डिजिटल पाल्पा’ र ‘प्राविधिक शिक्षा’ को एजेन्डा ल्याएका छन्। पाल्पाका युवाहरू विदेश पलायन हुनुपर्ने बाध्यतालाई अन्त्य गर्न स्थानीय स्तरमै सीप र उद्यमशीलता जोड्ने उनको प्रतिबद्धताले युवा मतदाताहरूलाई उत्साहित बनाएको छ।
जितका ५ अकाट्य आधारहरू:
• अनुभव र उर्जा: विद्यार्थी राजनीतिदेखि संसदसम्मको खारिएको अनुभव।
• विकासको निरन्तरता: सिद्धबाबा सुरुङमार्ग र रिडी-रुद्रवेणी-वामीटक्सार सडकको नेतृत्व।
• पार्टी एकता: पाल्पा एमालेभित्रको चट्टानी एकता र संगठनात्मक शक्ति।
• आम स्वीकार्यता: एमाले बाहिरका मतदाताले पनि रुचाउने शालीन व्यक्तित्व।
• जनतासँगको सामीप्यता: चुनावमा मात्र होइन, सधैँ जनताको सुख-दुःखमा पुग्ने स्वभाव।
ठाकुर गैरेका लागि यो निर्वाचन केवल पदको लडाइँ होइन, पाल्पाको स्वाभिमान र समृद्धिको लडाइँ हो। फागुन २१ गते हुने मतदानले पाल्पाको भविष्य तय गर्नेछ।
