२६ साउन, धरान (सुनसरी) रासस — सुनसरीको भोक्राहा नरसिंह गाउँपालिका-३, जलुवाटोलस्थित पूर्व–पश्चिम राजमार्गमा आज बिहान बस र माइक्रोबस आपसमा ठोक्किँदा कम्तीमा ३ जनाको मृत्यु भएको छ र १५ जना घाइते भएका छन्।
जिल्ला प्रहरी कार्यालय सुनसरीका प्रवक्ता योगराज खतिवडाका अनुसार काँकडभिट्टाबाट दिक्तेलतर्फ जाँदै गरेको मे१ख १७९९ नम्बरको बस र विपरीत दिशाबाट आइरहेको प्रदेश २-०१-००१ ज ००४७ नम्बरको माइक्रोबस ठोक्किएका हुन्।
प्रहरीका अनुसार मृत्यु हुनेहरूको पहिचान अहिलेसम्म खुल्न बाँकी छ। घाइतेहरूलाई इनरुवा, विराटनगर न्यूरो, र नोबेल अस्पतालमा उपचारका लागि पठाइएको छ।
बस चालक झापा अर्जुनधारा नगरपालिका–१ का गोपाल अधिकारीलाई प्रहरी नियन्त्रणमा लिएको र घटनाबारे थप अनुसन्धान भइरहेको प्रहरीले जनाएको छ।
